Yangiliklar

Tog ‘-kon sanoati va geologiya vazirligi topshirig‘iga asosan “O‘zbek geologiya qidiruv” AJ Toshkent Markaziy geologiya qidiruv ekspeditsiyasi tomonidan Angren qo‘ng‘ir ko‘mir koni Nishbosh uchastkasida ko‘mir qatlamlarini o‘rganish maqsadida geologik qidiruv ishlari olib borilmoqda. Ilgari olib borilgan geologiya qidiruv ishlarida ko‘mir qatlamidan kern olish miqdori 70-80% tashkil qilgan bo‘lsa, hozirgi kunda esa yangi zamonaviy burg‘ilash qurilmalari va texnologiyalari yordamida tog‘ jinslaridan 90% dan ortiq kern olishga erishilmoqda. Kernlarning yuqori miqdorda olinishi geologik o‘rganishlarda ishonchli va  to‘liq ma’lumot olishga yordam beradi.  

“O‘zbek geologiya qidiruv” AJ Samarqand MGQE binosida Samarqand shahar IIB xodimi Akbar Norqulov ishtirokida Korrupsiyaga qarshi profilaktik tadbir tashkil etildi. Korrupsiyaga qarshi kurashish bo‘yicha 2024 yillik ish-reja dasturi doirasida Ichki nazorat bo‘limi bosh mutaxassisi Qaxromon Majidov tomonidan targ‘ibot tadbiri o‘tkazildi. Shuningdek, Samarqand MGQEning Shimoliy Nurota va Zarafshon dala ekspeditsiyalari xodimlari, jami 200 ga yaqin ishchi va muhandis xodimlar korrupsiyaga qarshi o‘qitildi. Targ‘ibot davrida tashkilot tomonidan ishga qabul qilish, shartnomalar tuzilishi, to‘lovlar amalga oshirilishi va yoqilg‘i moylash mahsulotlarining sarfi bo‘yicha monitoringlar o‘tkazildi. Ishchi xodimlarning korrupsiyaga qarshi bilimlarini bilish va Jamiyat tomonidan korrupsiyaga qarshi menejment tizimining samaradorligini o‘rganish maqsadida anonim so‘rovnomalar o‘tkazildi.

Prezident Shavkat Mirziyoyev 29-aprel kuni geologiya va kon-metallurgiya sohalaridagi vazifalar muhokamasi yuzasidan yig‘ilish o‘tkazdi. Mamlakatimizda geologiya sohasiga har yili 1 trillion so‘mdan mablag‘ ajratilib, manzilli dasturlar amalga oshirilmoqda. Natijada o‘tgan yili tog‘-kon sanoatida ishlab chiqarish hajmi qariyb 11 milliard dollarga yetdi. Lekin bu, asosan, qimmatbaho va rangli metallar yo‘nalishida bo‘lib, sanoat uchun muhim minerallar bo‘yicha foydalanilmagan juda katta zaxira mavjud. Xususan, yurtimizda 32 turdagi shunday qazilma boyliklari bor. Shu bois 15-yanvar kuni o‘tgan taqdimotda davlatimiz rahbari bu yo‘nalishdagi imkoniyatlarni ishga solish bo‘yicha topshiriqlar bergan edi. Bugungi yig‘ilishda shu borada boshlangan ishlar, reja va takliflar ko‘rib chiqildi. Bugun jahonda texnologik vaziyat tez o‘zgarayapti. Elektromobil, “yashil” energetika, elektrotexnika sanoatida kamyob metallarga talab tobora ortib bormoqda. Shuning uchun so‘nggi yillarda jahon bozorida molibden, tellur, selen, grafit narxlari keskin oshgan. Prezidentimiz bu sohadagi ulkan imkoniyatlarni ko‘rsatib o‘tdi. Sanoat uchun muhim minerallar xomashyosi hamda ularning turini kengaytirish zarurligi ta’kidlandi. Hozirda yurtimizda 6 turdagi shunday mahsulot ishlab chiqariladi. Bunga qo‘shimcha platina, indiy, vanadiy metallari hamda volfram, molibden, rux, marganes kabi minerallardan yuqori qo‘shilgan qiymatli mahsulotlar olish imkoniyati bor. Masalan, avvallari o‘zimizda bo‘lmagan kukun metallurgiyasida yiliga 300 million dollarlik, uskunalar va butlovchi qismlar yo‘nalishida 100 million dollarlik qiymat yaratish mumkin. Yaqinda Yevropa Ittifoqi bilan muhim minerallar bo‘yicha erishilgan kelishuv bu borada katta bozor ochadi. Shulardan kelib chiqib, mutasaddilarga xorijiy ekspert va investorlar ishtirokida kamyob metallar bo‘yicha 500 million dollarlik istiqbolli loyihalar dasturini shakllantirish topshirildi. Bu yo‘nalishni ilm bilan rivojlantirish, shu maqsadda loyiha ofisi tashkil etib, yetakchi institut va ilmiy markazlarni jalb qilish zarurligi ta’kidlandi. Yig‘ilishda Navoiy kon-metallurgiya kombinatida qimmatbaho metallar zaxirasini ko‘paytirish rejalari ham ko‘rib chiqildi. Mutasaddilar oltin zaxirasini va ishlab chiqarish hajmini oshirish imkoniyatlari haqida axborot berdi. Prezidentimiz kombinatda ishlab chiqarish tannarxini 10-15 foizga pasaytirish, sanoat kooperatsiyasi va mahalliylashtirish qamrovini kengaytirish bo‘yicha ko‘rsatmalar berdi. Qimmatbaho metallar sohasida Ilg‘or texnologiyalar ilmiy markazini tashkil qilish vazifasi qo‘yildi.

“O‘zbek geologiya qidiruv” AJning Mehnat muhofazasi va texnika xavfsizligi bo‘limi va tarkibiy bo‘linmalarning masʼul xodimlari ishtirokida 2024 yil uchun mehnat muhofazasi va sanoat xavfsizligi holatlarini yaxshilash va baxtsiz hodisa va jarohatlanishlarning oldini olish bo‘yicha ishlab chiqilgan tashkiliy-texnik tadbirlar rejasining 1.11-bandi ijrosini bajarish maqsadida  tarkibiy bo‘linmalarda “Butunjahon mehnatni muhofaza qilish kuni” doirasida seminarlar o‘tkazildi.     Tadbir doirasida ishlab chiqarish bilan bog‘liq baxtsiz hodisalar tufayli jarohat olgan, boquvchisini yo‘qotgan va kasb kasalliklariga chalingan xodimlarning oilalariga tashrif buyurishib, ularning hollaridan xabar olindi.

“Oʻzbekiston – 2030” strategiyasi ramzining asosini “Yangi Oʻzbekiston” va “Uchinchi Renessans” timsoli sifatida “Yangi Oʻzbekiston” bogʻidagi Mustaqillik monumenti obrazi tashkil etadi. Ramzda aks ettirilgan Mustaqillik monumenti mamlakatimiz tarixi, bugungi kuni va kelajakning oʻzaro uygʻunligi ifodasi sifatida talqin etilsa, uning yuksaklikka boʻylashishi negizida xalqimizning birligi va birdamligi, Oʻzbekistonning dunyo davlatlari bilan hamjihatligi, tinchliksevar siyosati mujassamlashgan. Shuningdek, yuqoriga intilgan chiziqlar dinamikasida “Oʻzbekiston – 2030” strategiyasining beshta ustuvor yoʻnalishi va unda belgilangan 100 ta maqsadni toʻliq hamda muvaffaqiyatli amalga oshirish ezgu gʻoyasi mavjud. Logotipning yuqori qismida baxt-saodat, hurriyat va tinchlik timsoli hisoblangan qanotlarini yozgan Humo qushi tasvirlangan. U qadim, uch ming yildan ziyod davlatchilik tajribasiga ega, shu bilan birga, navqiron, orzu-maqsadlari ulkan, qonida erksevarlik tuygʻulari joʻsh urayotgan, mehnatsevar va oliyjanob xalqiga tayanadigan davlat timsoli sifatida gavdalangan. Humo qushga tutash ustunlar esa inson huquq va erkinliklari, milliy va umuminsoniy qadriyatlar, taʼlim va tarbiya, davlat va jamiyat muvozanatining ifodasi sifatida tasvirlangan. Shuningdek, mazkur element davlatning hokimiyatni amalga oshirishi, shu bilan birga jamiyat manfaatlari, erkinliklari, talablari oʻrtasidagi muvofiqlik va uygʻunlikni anglatadi. Strategiya ramzida yangi tahrirdagi Oʻzbekiston Konstitutsiyasida qoida sifatida belgilangan “Yangi Oʻzbekiston — ijtimoiy davlat” tamoyilining majoziy nishonasi sifatida uchburchak shakl elementidan foydalanilgan. U faol islohotlarni amalga oshirish davrida aholining barcha qatlamlarini muhofazalash, ular uchun teng imkoniyatlar yaratish, ayniqsa, oilalar, bolalar, ayollar, qariyalar, nogironligi boʻlgan shaxslarni har tomonlama qoʻllab-quvvatlash, ishsizlikdan himoya qilish, kafolatlangan sifatli taʼlim, malakali tibbiy yordam doimo davlat oldidagi ustuvor vazifa ekanligining tamal toshidir. Mustaqillik monumentining ichki qismida aks ettirilgan jamiyat – Oʻzbekistonning bir xalqi obrazi hisoblanadi. Unda yuksak insoniy fazilatlar sohibi boʻlgan, ulugʻ maqsad yoʻlida birlashgan, tinchliksevar, mehnatkash, bagʻrikeng va dono xalqimiz gavdalanadi. Shuningdek, mazkur obraz mamlakatda amalga oshirilayotgan barcha islohotlar inson qadri, uning farovon turmush kechirishiga qaratilayotganini aks ettirib, davlatning bebaho boyligi xalq ekanligini anglatadi. Ushbu element xalqimizning tenglik, ijtimoiy adolat va birdamlik gʻoyalariga sadoqatli ekanligini namoyon qiladi. Shu bilan birga, u mustahkam oila jamiyatning asosiy boʻgʻini sifatida doimo jamiyat va davlat muhofazasida ekanligini ifodalaydi. “Taraqqiyot strategiyasi” markaziAxborot xizmati

Hisorda “Butunjahon mehnatni muhofaza qilish kuni”ga bag‘ishlangan seminar o‘tkazildi. Seminarda Hisor MGQE rahbariyati, Kasaba uyushma qo‘mitasi vakillari hamda dala ekspeditsiyasi va uchastka ishchi-xodimlari ishtirok etishdi. Uchrashuv davomida so‘zga chiqqanlar tashkilotda mehnatni muhofaza qilish ishlarini to‘g‘ri tashkil etish va ishlab chiqarish jarayonlarida vujudga kelishi mumkin bo‘lgan baxtsiz hodisalarni oldini olish, xavfsizlik texnikasi choralarini ko‘rish hamda bu borada ishchi-xodimlarga yaratilgan sharoitlar va boshqa shu kabi masalalarga batafsil to‘xtalib o‘tishdi.

“O‘zbek geologiya qidiruv” AJ Hisor MGQEda Geologiya fanlar universiteti xodimlari bilan uchrashuv bo‘lib o‘tdi. Uchrashuvda GFUda olib borilayotgan taʼlim sifati va bakalavriat, magistratura yo'nalishlarida o‘qish va o‘qitish bosqichlari to‘g‘risida ma'lumotlar berib o‘tildi. Tadbir davomida tashkilot xodimlari o‘zlarini qiziqtirgan savollariga javoblar olishdi.

Joriy yilning 25-aprel kuni O‘zbekiston Milliy matbuot markazida “O‘zbek geologiya qidiruv” AJda 2023-yil yakunlari, erishilgan natijalar hamda 2024-yilda rejalashtirilgan loyihalar bo‘yicha Matbuot anjumani bo‘lib o‘tdi. Unda ommaviy axborot vositalari vakillari va jurnalistlar ishtirok etdilar. Matbuot anjumanida “O‘zbek geologiya qidiruv” AJ asosiy vazifalari xususida maʼlumot berildi. Xususan jamiyat yer qaʼrini geologik o‘rganish xususan rangli qimmatbaho metallar va boshqa foydali qazilma maydonlarda geologik-qidiruv ishlarini tashkil etish, rangli va qimmatbaho metallarning istiqbolli maydonlarini topish uchun ilmiy-tematik ishlar, bashoratli resurslar va mavjud maydonlarning mayda, o‘rta va yirik masshtabli geologik xaritalarini yaratish asosida respublika mineral-xom ashyo bazasini kengaytirishdan iborat. 2023-yilda aksiyadorlik jamiyati geologiya-qidiruv ishlarini olib borish foydali qazilma konlarni izlash, baholash va laboratoriya tahlil jarayonlarini, topografik, geologik tasvirlash hamda xaritalash ishlarini amalga oshirdi. O‘zbekiston Respublikasi hududida davlat byudjeti va maxsus mablag‘lar hisobidan 48 ta loyiha asosida 1430 km2 maydonda geologik-qidiruv ishlarini amalga oshirib, bu loyihalar asosida oltin, mis, qurg‘oshin va rux, volfram, noyob metall va kamyob yer elementlar, noruda foydali qazilmalarga geologik qidiruv ishlarini hamda laboratoriya tadqiqot ishlarini bajardi. Yil yakunida 10 ta loyiha tugatilib, aniqlangan zaxira va bashorat resurslari Davlat zaxiralari komissiyasiga topshirildi. Geologik qidiruv ishlarining asosiy qismini burg‘ilash jarayoni tashkil qilib o‘tgan yilda jami 640 974 p.m. burg‘ilash ishlari olib borildi. Jumladan shnekli burg‘ilash 61 887 p.m., xavo zarbali burg‘ilash 86 915 p.m., xaritali burg‘ilash 71 074 p.m., kolonkali burg‘ilash 421 071 p.m. hamda yer osti tog‘-kon ishlari 4 334 p.m., va yer usti tog‘-kon ishlari 243 534 m3 ga ni tashkil qildi. O‘tgan davr mobaynida zamonaviy burg‘ilash uskunalari orqali 1000 - 1 200 metr chuqurlikgacha burg‘ilash ishlari bajarilishiga erishildi. Bu esa albatta, foydali qazilma resurslari va mineral xom ashyo bazasini kengaytirishda katta ahamiyatga ega. Amalga oshirilgan geologik qidiruv ishlari respublikamizning Navoiy, Samarqand, Qashqadaryo, Surxondaryo, Jizzax  va Toshkent viloyatlari hududiga to‘g‘ri keladi. Geologik qidiruv ishlari natijasida nafaqat davlat zaxiralarini rivojlantirish balkim Navoiy va Olmaliq KMKlarining xomashyo bazasi oshiriladi. Geologik qidiruv ishlari natijasida olingan namunalarni aksiyadorlik jamiyati tarkibidagi laboratoriyalarda tahlil qilinib yakuniy xulosa olinadi. 2023-yilda Markaziy laboratoriya namunalarni sifatli laboratoriya tadqiqot ishlarini tashkil qilish bo‘yicha qator muvffaqiyatga erishdi. “O‘zbek geologiya qidiruv” aksiyadorlik jamiyatining operatsion samaradorlikni oshirish, o‘rta va uzoq muddatli rivojlanish strategiyasiga muvofiq Markaziy laboratoriya Mustaqil Davlatlar Hamdo‘stligi davlatlarida o‘tkaziladigan qiyosiy sinovlarda faol qatnashib kelmoqda. 2023-yilda Rossiya federatsiyasidagi “Minstandart” MCHJning PK №RMO-2-2023 “Polimetall rudalar” va RO-1-2023 “Platinatarkibli rudalar” dasturlari bo‘yicha ikkita qiyosiy sinovlarda ishtirok etib, ikkala holatlarda ham laboratoriya o‘zining yuqori malakasini ko‘rsatdi va reytingda faxrli o‘rinlardan joy egalladi. Shuningdek, Markaziy laboratoriyada ishlab chiqilgan “Agilent 4200 MR-AES mikroto‘lqin plazmalik atom-emission spektrometridan foydalangan holda tog‘ jinslarida reniyning massaviy ulushini aniqlash” uslubi MDH davlatlari o‘rtasida tan olindi hamda N. Fedorovskiy nomidagi Butunrossiya mineral xomashyo ilmiy-tadqiqot institutining Analitik usullar bo‘yicha ilmiy kengashi tomonidan uslubni Mustaqil Davlatlar Hamdo‘stligi mamlakatlarida qattiq foydali qazilmalar bo‘yicha geologiya qidiruv ishlari bajarilganda qo‘llash mumkin bo‘lgan uslublar qatoriga kiritildi. Bu 40 yil ichida O‘zbekistondan geologiya qidiruv ishlari bajarilganda qo‘llash mumkin bo‘lgan uslublar kitobiga kiritilgan birinchi metod hisoblanadi. Shu bilan bir qatorda 2024-yilning birichi choragida Markaziy laboratoriyaning analitik tadqiqotlar va laboratoriyalararo taqqoslash sohasidagi katta tajribasini inobatga olgan holda Texnik qo‘mita o‘z qarori bilan “O‘zbek geologiya qidiruv” AJ Markaziy laboratoriyasiga tabiiy obyektlarni: suv va qattiq jismlarni tahlil qilish sohasida tadqiqotlar olib boradigan laboratoriyalarning malakasini tekshirish (PPK) provayderi sifatida vakolat berdi. Mamlakatimizda ishlab chiqarilayotgan elektr energiyasini tejash, muqobil energiya manbalaridan foydalanishni yo‘lga qo‘yish maqsadida aksiyadorlik jamiyati tomonidan 500 kVt dan ziyod quyosh foto elektr stansiyalari o‘rnatilib foydalanishga topshirildi. Bugungi kunda aksiyadorlik jamiyatida faoliyat olib borayotgan 3400 ga yaqin xodim belgilangan dasturlar asosida muntazam malaka oshirib kelmoqdalar. Xususan o‘tgan yil davomida 800 dan ortiq xodim Geologiya tarmog‘i xodimlari malakasini oshirish institutida, 40 ta xodim Tog‘-kon, geologiya va sanoat xavfsizligini nazorat qilish inspeksiyasida, 25 ta xodim “CERT academy International training company”da va boshqa bir qator o‘quv kurslarida kasb malakalarini oshirishdi. Yana shuni alohida taʼkidlab o‘tish kerakki, 211 nafar xodim oliy taʼlim muassasalarida va 60 nafar xodim texnikumda tahsil oldi. 2023-yilda aksiyadorlik jamiyatida xodimlar o‘rtasida sog‘lom turmush tarzini shakllantirish va maʼnaviy-maʼrifiy ishlar samaradorligini oshirish maqsadida “Sport –salomatlik garovi”, “Kasaba uyushmasi kubogi”, “Balli qizlar” ko‘rik-tanlovi musobaqalari o‘tkazildi shuningdek, 400 dan ortiq xodimlar sog‘lomlashtirish markazlariga jo‘natildi. Shuningdek, Respublika bo‘ylab mahalliy sayohatlarni tashkil qilish maqsadida xodimlar ishtirokida “O‘zbekiston bo‘ylab sayohat qiling” shiori ostida ichki turizm tadbirlari tashkil etildi. Bunda 700 ga yaqin xodim yurtimizning tarixiy shaharlariga sayohat qilishdi. Aksiyadorlik jamiyati korrupsiyaga qarshi boshqaruv tizimini ishlab chiqish, joriy etish, tahlil qilish va takomillashtirish maqsadida 2023 yil yakunida korrupsiyaga qarshi boshqaruv tizimining xalqaro ISO 37001:2016 sertifikatini qo‘lga kiritdi. Xalqaro standart asosida korrupsiya holatlarining oldini olish, aniqlash va bartaraf qilish uchun zarur bo‘lgan barcha choralarni amalga oshirmoqda. Boshqaruv raisi o‘rinbosari Sh.Sirajov 2024-yilda “Yoshlar va biznesni qo‘llab-quvvatlash yili”da amalga oshirishga oid davlat dasturi asosida geologiya qidiruv ishlarini yana-da rivojlantirish va xorijiy davlatlarda ham geologiya qidiruv ishlarini tashkil etish rejalashtirilgan bo‘lib, xususan, burg‘ilash ishlari va texnologiyalari bo‘yicha xizmat ko‘rsatish turlarini kengaytirish, geofizik tadqiqotlarni rivojlantirish, modellashtirish, yer va havo geofizikasi ishlarini bajarish quvvatlarini modernizatsiya qilish va kuchaytirish, shuningdek ishlab chiqarish jarayonlariga ilg‘or tajriba va uslublarni joriy etish ko‘zda tutilish haqida batafsil ma’lumot berdi. Matbuot anjumani yakunida jurnalistlar tomonidan berilgan savollarga mas’ullar tomonidan atroflicha javob berib o'tdi.     “O‘zbek geologiya qidiruv” Axborot xizmati  

“O‘zbek geologiya qidiruv” AJ Korrupsiyaga qarshi kurashish bo‘limi maʼsul xodimlari tomonidan 2024 yilga mo‘ljallangan ish-rejasi asosida Samarqand MGQEga qarashli Zarmitan dala ekspeditsiyasida targ‘ibot tadbirlarini o‘tkazishdi. Unda korrupsiyaga qarshi tushuntirish ishlari yaʼni yoqilg‘i maxsulotlari sarfi, ishlatilishi, yo‘l varaqalari yuritilish bo‘yicha monitoring ishlari o‘tkazildi. Targ‘ibot tadbirida Jamiyatning korrupsiyaga qarshi kurashish mexanizmlari va huquqiy asoslari mavzusida o‘tkazilib 50 ta dala sharoitida 11 ta, maʼmuriy binoda 39 ishchi xodimlar qamrab olinib ularda korrupsiyaga qarshi murosasizlik munosabatlari shakllantirildi.