«O‘zbek geologiya qidiruv» aksiyadorlik jamiyati

“O‘zbek geologiya qidiruv” AJ tarkibidagi Hisor Markaziy geologiya qidiruv ekspeditsiyasi tomonidan yillik reja asosida geologiya qidiruv ishlari jadal amalga oshirilmoqda. Bugungi kunda Markaziy ekspeditsiya tarkibidagi Qashqadaryo dala ekspeditsiyasi tomonidan Tyubegatan kaliy tuz konining shimoliy-sharqiy qismida joylashgan Qurg‘ontosh istiqbolli maydonida kaliy tuzlarini baholash ishlari olib borilmoqda. Mazkur loyiha Tog‘-kon sanoati va geologiya vazirligining 2024-yilga mo‘ljallangan mineral xomashyo bazasini rivojlantirish va qayta to‘ldirish Davlat dasturi hamda “O‘zbek geologiya qidiruv” AJning 2024-yilga mo‘ljallangan geologik qidiruv rejasi asosida amalga oshirilmoqda. Loyiha asosida aniqlangan maʼdan tanalarida C1+C2 toifadagi kaliy tuzini sanoatbop zaxiralarini hisoblash ko‘zda tutilgan. Qo‘rg‘ontosh maydonida 2024-2025-yillarda jami 12 ta umumiy chuqurligi 4750 p.m. bo‘lgan burg‘ilash quduqlarini o‘tish loyihalashtirilgan bo‘lib, shundan 1-2-burg‘ilash quduqlarida 389 va 370 p.m. uzunlikda burg‘ilash ishlari yakunlandi, hozirda 3-4-burg‘ilash quduqlarida burg‘ilash ishlari olib borilmoqda.    “O‘zbek geologiya qidiruv” AJ Axborot xizmati

Siz va oila aʼzolaringizga sihat-salomatlik, xotirjamlik, xonadonlaringizga fayzu baraka ato etishini tilab qolamiz. Muqaddas ayyom – Ramazon hayiti barchangizga muborak boʼlsin!

Prezident Shavkat Mirziyoyev Jizzax viloyati Sharof Rashidov tumanida qurilayotgan “Yangi O‘zbekiston” massivini borib ko‘rdi. Viloyatda ilgari hech bunday keng ko‘lamli qurilishlar bo‘lmagan edi. So‘nggi yillarda o‘nlab zavodlar ishga tushirildi, yangi sanoat tarmoqlari paydo bo‘ldi. Shunga yarasha ijtimoiy infratuzilma ham barpo etilmoqda. Sharof Rashidov tumanining bu hududi adir yonbag‘ri, undan deyarli foydalanilmas edi. Hozir 140 gektarli ulkan maydonda jadal qurilish ketmoqda. Loyiha uch bosqichli bo‘lib, 3 ming 936 xonadonli 105 ta ko‘p qavatli uy barpo etilishi rejalashtirilgan. Uylar 9, 12 va 16 qavatli bo‘lib, bu ham Jizzax sharoitida yangilik. Ayni paytda birinchi bosqich doirasida 204 xonadonli 4 ta ko‘p qavatli uy, markaziy qozonxona, shourum va ichki yo‘llar qurilgan. Yana 16 ta turar joy, maktab va maktabgacha ta’lim muassasasi, savdo markazi bunyod etiladi. “Inno texno park” aholini ish bilan ta’minlashda qo‘l keladi. Ikkinchi bosqich 2026-, uchinchisi 2028-yillarga reja qilingan. Bunda uylardan tashqari mahalla markazi, poliklinika, masjid, mehmonxona, bolalar va sport o‘yingohlari, “Yangi O‘zbekiston” bog‘i barpo etiladi. Bo‘sh maydonlarga ham daraxtlar ekilib, xiyobonga aylantiriladi. Davlatimiz rahbari bu yil rejalashtirilganiga qo‘shimcha uylar qurib, imtiyozli ipoteka kreditlari orqali aholiga xarid imkoniyatini yaratish bo‘yicha ko‘rsatmalar berdi. Shunga mutanosib ravishda infratuzilma tarmoqlari, maktab, bolalar bog‘chasi kabi ijtimoiy muassasalar qurilishini jadallashtirish, savdo va xizmatlarni, jumladan, yo‘l bo‘yida umumiy ovqatlanish shoxobchalarini tashkil etish muhimligi ta’kidlandi. Jizzax viloyatida uchta shunday massiv barpo etilmoqda. Ularda 4 ming 700 xonadonga ega 156 ta ko‘p qavatli uy quriladi. Aholi barcha ijtimoiy xizmatlar bilan ta’minlanadi. “Yangi O‘zbekiston” massivlari qurish harakati O‘zbekiston Respublikasi Prezidentining 2021-yil 9-dekabrdagi farmoniga muvofiq boshlangan. Umuman, mamlakatimizda 53 ta massivda bunyodkorlik ishlari olib borilmoqda. Bugungi kunda 14 ming 400 ta xonadonli 409 ta ko‘p qavatli uy foydalanishga topshirilgan. Joriy yilda bunday massivlarda 31 ming 447 ta xonadondan iborat 767 ta turar joylar qurilishi belgilangan.

"Geologiya sohasi xodimlari" kuni bilan sohada faoliyat olib borayotgan barcha xodimlarni samimiy muborakbod etamiz! "O‘zbek geologiya qidiruv" aksiyadorlik jamiyatining mavqeyini, geologik qidiruv ishlarining samaradorligini oshirishga, yangi foydali qazilma konlarini ochilishiga va respublika mineral-xomashyo bazasini rivojlantirish yo‘lida olib borayotgan mehnatlaringizni qadrlaymiz! Vatanimiz taraqqiyoti yo‘lidagi faoliyatingizga yangidan-yangi zafarlar tilaymiz. Bayramingiz muborak bo‘lsin hurmatli geologlar!

2024-yil 5-aprel kuni Geologiya fanlari universitetida Geologiya sohasi xodimlari kuni munosabati bilan tadbir bo‘lib o‘tdi.  Unda geologiya sohasida uzoq yillar davomida ishlagan faxriylar, olimlar, ustoz-murabbiylar, vazirlik tasarrufidagi korxona hamda tashkilotlar rahbarlari ishtirok etishdi. Tadbirni Tog‘-kon sanoati va geologiya vaziri B.Islamov kirish so‘zi bilan ochib berdi va geologiya sohasining asosiy yutuqlari, muammolari va istiqbollari to‘g‘risida maʼruza qildi.  Soha rivojiga o‘zining munosib hissasini qo‘shib kelayotgan yetakchi mutaxassislar va ustoz maqomidagi geologlarga vazirlikning “Faxriy yorliqlari” topshirildi.

"O‘zbek geologiya qidiruv" AJ Samarqand Markaziy geologiya qidiruv ekspeditsiyasi raxbariyati va xodimlari Muqaddas Ramazon oyi arafasida hamda Geologiya sohasi xodimlari kuni munosabati bilan, sohada uzoq yillar davomida mehnat qilib faoliyat yuritgan nafaqadagi mehnat faxriylarini bayram bilan tabriklab xonadonlariga tashrif buyurishdi.

Xabaringiz bor joriy yilning 15-martdan 15-aprelga qadar Respublikamizda «Fuqaro muhofazasi oyligi» deb e’lon qilingan. Shu munosabat bilan Hisor Markaziy geologiya qidiruv ekspeditsiyasida Favqulodda vaziyatlar boshqarmasi xodimlari ishtirokida seminar bo‘lib o‘tdi. Seminarda fuqaro muhofazasini tashkil etish hamda mavsumiy favqulodda vaziyatlarning oldini olish chora-tadbirlari xususida fikr yuritildi.     

Ma‘lumki, Prezidentimiz tashabbusi bilan har yili bahor-kuz mavsumida “Yashil makon” umummilliy loyihasi doirasida ko‘kalamzorlashtirish ishlari amalga oshirilib kelinmoqda. Yurtimizga kirib kelgan bahor faslining ilk kunlaridan boshlab barcha hududlarda “Yashil makon” umummilliy loyihasi doirasida ko‘chat ekish, ko‘kalamzorlashtirish va obodonlashtirish ishlari boshlab yuborildi. Shu maqsadda bugun, 5-aprel kuni Toshkent viloyati Angren tumanida “O‘zbek geologiya qidiruv” AJ tashabbusi bilan “Geologlar bog‘i”ni tashkil etish tadbiri ko‘tarinki ruhda boshlab yuborildi. Hasharda barcha xodimlar faol ishtirok etib bog‘ga ko‘chatlar ekishdi. Bog‘ni obod qilish ishlari davom etmoqda.    

2024-yil 28-mart kuni Energetika vazirligida AQSh senatori Stiven Deyns boshchiligidagi delegatsiya bilan uchrashuv boʻlib oʻtdi. Uchrashuvda Oʻzbekiston Respublikasi togʻ-kon sanoati va geologiya vaziri B.Islamov, Energetika vaziri J.Mirzamahmudov ishtirok etdilar. Tadbirda togʻ-kon sanoati va geologiya-qidiruv hamda yoqilgʻi-energetika sohalaridagi hamkorlik yuzasidan fikr almashildi. Mazkur yoʻnalishlarda oʻzaro aloqalarni yanada mustahkamlash uchun katta imkoniyatlar mavjudligi, kelgusida bundan samarali foydalanish ikki taraf uchun ham manfaatli ekanligi taʼkidlandi.